2011
La vojo al reciproka vivigo kaj paco Jam venis la nova jaro esperplena. Mi bondeziras, ke la tuta kredantaro, la tuta popolo kaj la tuta homaro estu ĉiam kun la bonfaro kaj lumo de la darmkorpa budho, la kvar bonfaroj, kaj ke la jaro estu plena de feliĉo kaj paco. En la pasinta jaro niaj laikaj kaj pastraj kredantoj per siaj spirita atingo kaj ŭonbulisma disvastigo tutforte faris strebadon al la centjara jubileo de ŭonbulismo por firmigi la fundamenton de la eklezia fruktodona periodo kaj elstarigi nian eklezion kiel ĉefan eklezion de la mondo.
Sotesano, la fondinto de ŭonbulismo, diris: “Koreio estas tia, ke fiŝo transformiĝas
al drako, kaj en la estonteco nia lando fariĝos la gvida lando de spirito kaj la gepatra lando de moralo en la mondo.” Malgraŭ ekonomia krizo kaj malfaciloj de la ambaŭkoreia rilato, ni sukcese organizis la seulan pintkunvenon de G20 kaj tiris mondan atenton al ni.
Tamen kreskas konflikto kaŭzita de militfortaj kolizioj inter Suda kaj Norda Koreioj.
Ankoraŭ ĉie en la mondo daŭras malharmonio kaj malamikeco inter regionoj, inter
klasoj, inter ideologioj, inter generacioj, inter viroj kaj virinoj, inter dungantoj kaj
dungatoj. Kiel do ŝanĝi ĉi tian rilaton de reciproka konflikto kaj nekredo al la rilato de reciproka vivigo kaj paca kunekzisto? Tio estas la plej granda tasko de ĉi tiu epoko.
Rimedon por ĉi tiu tasko jam montris Sotesano en la ĉefaj punktoj de la progreso de fortulo kaj malfortulo, por ke kaj fortulo kaj malfortulo iru al la vera civiliza mondo, vivigante kaj harmoniigante unu la alian.
Mi volas, ke ĉi-jare ni vivu konforme al la jenaj tri punktoj por fariĝi fortulo, kiu
bonfaras al la mondo spirite, fizike kaj materiale, kaj por fari pacan mondon, kie ni ĉiuj progresas.
Unue, fortulo devas estu fortulo kun moraleco.
Se fortulo volas fariĝi eterna fortulo, tiu devas trovi la fundamentan bonfaron, kreskigi sian kapablon, dividi sian frukton kaj nepre havi necesajn kondiĉojn por alfronti ŝanĝon. Se fortulo neglektas la fundamentan bonfaron, malzorgas kreskigon de sia kapablo, misuzas sian forton, avaras al malfortulo protekton aŭ ne povas fari gvidan rolon en ŝanĝo, tiu fine fariĝas malfortulo. Tial, se fortulo volas fariĝi eterna fortulo, tiu devas mem kontroli sian avidon kaj havi kompaton kaj moralecon por konduki malfortulon al fortulo.
Due, malfortulo devas esti malfortulo progresanta.
Malfortulo ne povas transpaŝi fortulon nur per kontraŭstaro al fortulo sen ajna penso. Kaj malfortulo devas ne rezigni sin mem, se tiu volas liberiĝi de la doloroj travivataj kiel malfortulo. Ĉar en la mondo estas nek eterna fortulo, nek eterna malfortulo. Do malfortulo devas firme kredi la veron de karmo, laŭ kiu oni tiom rikoltas, kiom oni ŝvitas, kaj lerninte realigi la avantaĝojn kaj necesaĵojn de fortulo, kaj fari plejan penadon ĝis sia fortuliĝo. Krome malfortulo devas sekvi antaŭiranton kiel modelon kaj teni bonfaran rilaton de reciproka vivigo. Tiam fine malfortulo fariĝos fortulo.
Trie, fortulo kaj malfortulo devas vivigi sin reciproke por realigi pacon.
La nuna mondo tro emfazas nur konkuradon. En ĉi tiu procezo naskiĝas malmorala fortulo kaj malprave subpremata malfortulo, tiel ke pligrandiĝas nekredo, malamo kaj konflikto inter ambaŭ. Tial ni devas krei sociajn kondiĉojn, por ke fortulo kaj malfortulo helpu kaj bonfaru unu al la alia. Nuntempe, por fortulo necesas grandanimeco kaj zorgo pri tio, ĉu ne troviĝas malfortulo, kiu sentas sin neglektata aŭ malprave traktata. Kaj por malfortulo necesas klopodo preni fortulon kiel gvidanton kaj alproprigi la avantaĝojn de fortulo.
Ĉiam ŝanĝiĝas la rilato inter fortulo kaj malfortulo. Kredante kaj iluminiĝante pri la principo de kaŭzo kaj efiko, kiu estras la ŝanĝiĝon, fortulo devas peni por eterne ĝui sian abundecon, kaj malfortulo devas plenigi kaj venki sian mankon por progresi al fortulo. Ĉiuj gvidantoj devas mem klare kompreni, ke fortulo kaj malfortulo havas tian bonfaran rilaton, ke iu neniel povas vivi sen la alia, kaj gvidi ilin, por ke ili ambaŭ danku kaj bonfaru unu al la alia.
Mi deziras, ke en la nova jaro la socio estiĝu tia matura socio de reciproka vivigo kaj paco, en kiu fortulo kaj malfortulo helpas kaj bazas unu la alian.
Novjaran matenon en la 96a ŭonbulana jaro (2011)
Gjongsan, ĉefmajstro de ŭonbulismo
Tradukis CHOE Taesok.