17. Esther
1:1 ( Di Sinunod ni Reyna Vasti si Haring Asuero ) Nang panahon ni Haring Asuero ng Persia, ang sakop niya'y mula sa India hanggang Etiopia. Binubuo ito ng 127 lalawigan.
1:2 Ang kanyang palasyo ay nasa Lunsod ng Susan na siyang kabisera.
1:3 Nang ikatlong taon ng kanyang paghahari, piniging niya ang kanyang mga pinuno, mga katulong sa palasyo, mga punong-kawal ng Persia at Media, pati mga mahal na tao at mga gobernador ng mga lalawigan.
1:4 Ipinagparangalan niya sa mga ito ang kayamanan ng kanyang kaharian at ang karangyaan ng kanyang pamumuhay. Ang piging ay tumagal nang 180 araw.
1:5 Pagkaraan nito, pitong araw naman niyang piniging ang lahat ng taga-Susan, dakila o hamak. Ito'y ginanap sa patyo sa may hardin ng palasyo.
1:6 Puting-puti ang mga kurtina at maraming palawit na kulay asul. Ang mga tali nito'y nilubid na pinong lino at murado, at nakasabit sa mga argolyang pilak. Marmol ang mga haligi ng palasyo. Yari sa ginto't pilak ang mga upuan. Ang sahig ay mosaik na yari sa porfido, alabastro, nakar, at mamahaling bato.
1:7 Ang mga kopitang iba't ibang hugis ay ginto. Maraming-maraming alak na pawang mamahalin; angkop lamang sa isang hari.
1:8 Nasa ayos ang pag-iinuman. Walang pilitan sapagkat ipinagpauna ng hari sa kanyang mga katulong na ibigay ang hilig ng bawat isa.
1:9 Samantala, si Reyna Vasti ay nagdaos din ng piging sa palasyo para naman sa kababaihan.
1:10 Nang ikapitong araw na ng pagdiriwang, medyo lango na ang hari. Ipinatawag niya sina Mehuman, Bizta, Harvona, Bigta, Abagta, Zetra at Carcas, ang pitong eunukong nag-aasikaso sa kanya.
1:11 Ipinasundo niya si Reyna Vasti. Ipinasabi niyang isuot ng reyna ang korona nito upang ipagparangalan sa lahat ng naroon ang kagandahan nito sapagkat ito nama'y talagang maganda.
1:12 Ngunit hindi pinansin ng reyna ang mga sugo ng hari. Dahil dito, nagalit ang hari.
1:13 Tuwing may pangyayaring tulad nito, ipinatatawag ng hari ang mga pantas tungkol sa kapanahunan, mga dalubhasa sa batas at paghatol
1:14 upang sangguniin. Ito'y sina Carsena, Setar, Admata, Tarsis, Meres, Marsena at Memucan. Sila ang pitong pangunahing pinuno ng Persia at Media. Malapit sila sa hari, at mga pangunahin sa buong kaharian.
1:15 "Itinanong ng hari, 'Ano ang dapat gawin kay Reyna Vasti dahil sa pagsuway niya sa utos ko sa pamamagitan ng mga sugo?' "
1:16 "Sumagot si Memucan, 'Si Reyna Vasti ay nagkasala, hindi lamang sa hari kundi pati sa mga pinuno at sa lahat ng nasasakupan ninyo, Haring Asuero."
1:17 Ang pangyayaring ito'y tiyak na malalaman ng lahat ng babae sa kaharian. Kung magkagayon, magkakaroon sila ng katwirang sumuway sa kanilang asawa. Idadahilan nilang sinuway ni Reyna Vasti ang hari.
1:18 Ngayon pa ay natitiyak kong alam na ito ng mga pangunahing babae ng Persia at Media at sasabihin na sa mga pinuno ng hari. Dahil dito, tiyak na lalaganap ang kawalang-pitagan sa mga lalaki, at ito'y hahantong sa maraming kalupitan.
1:19 Kaya, kung inyong mamarapatin, magpalabas kayo ng isang utos. Ito'y ilalakip sa mga kautusan ng Persia at Media para hindi mabago. Sa bisa ng utos na ito, aalisin kay Vasti ang pagiging reyna at papalitan siya ng mas mabuting reyna.
1:20 "Kapag ito'y naipahayag na sa buong kaharian, tiyak na igagalang ng mga babae ang kanilang mga asawa, maging hamak o dakila.' "
1:21 Nagustuhan ng hari ang payo ni Memucan, pati ng kanyang mga pinuno.
1:22 Pinadalhan niya ng sulat ang mga lalawigang sakop niya, bawat lalawiga'y sa kanya-kanyang wika, upang kilalanin na ang mga lalaki ang siyang puno ng sambahayan. Ang utos ding ito ang magiging batayan niya sa pamumuno sa sariling sambahayan.
2:1 ( Naging Reyna si Ester ) Lumipas ang mga araw. Nang mapawi ang galit ni Haring Asuero ay naalaala niya si Vasti, ang ginawa nito at ang utos na nilagdaan niya laban dito.
2:2 '"Bakit di kayo magpahanap ng magagandang dalaga, Kamahalan?' tanong sa kanya ng kanyang mga tagapaglingkod."
2:3 '"Pumili kayo ng mga tauhan sa bawat lalawigan para humanap ng magagandang dalaga sa kanilang lugar at dalhin sa inyong harem sa Lunsod ng Susan. Ang mga ito'y ipagkatiwala kay Hegeo, ang eunukong namamahala sa harem ng hari, at bigyan ng mga pampagandang kailangan nila."
2:4 "Ang magustuhan ng hari ang siyang ipapalit kay Vasti.' Nagustuhan ng hari ang payong ito. "
2:5 Noon, may isang Judio na nakatira sa Susan. Siya'y si Mardoqueo na anak ni Jair at apo ni Simei na anak naman ni Cis na Benjaminita.
2:6 Isa siya sa mga nabihag ni Haring Nabucodonosor at dinala sa Babilonia mula sa Jerusalem, kasama ng Haring Jeconias ng Juda.
2:7 Si Mardoqueo ay may pinsang dalaga na ulilang lubos at siya ang nagpalaki. Ito'y si Hadassa o Ester na anak ni Abihael. Maliit pa ito nang mamatay ang mga magulang. Mula noon, inampon siya ni Mardoqueo at pinalaking parang tunay na anak. Maganda at kabigha-bighani si Ester.
2:8 Bilang tugon sa utos ng hari tungkol sa paghahanap ng magagandang dalaga sa buong kaharian, napabilang siya sa maraming dalagang tinipon sa palasyo sa pamamahala ni Hegeo na tagapangasiwa sa harem.
2:9 Nakagaanan siya ng loob ni Hegeo, kaya binigyan agad ng pagkain at mga pampaganda. Ipinili pa siya ng mainam na tirahan at binigyan ng pitong katulong na babae.
2:10 Hindi sinabi ni Ester kung saang lahi o sambahayan siya nagmula pagkat iyon ang bilin sa kanya ni Mardoqueo.
2:11 Araw-araw naman, si Mardoqueo'y nagpupunta sa patyo ng harem upang alamin ang katayuan ni Ester.
2:12 Bilang tuntunin, isang taon munang pagagandahin ang mga babae: anim na buwang minamasahe ng langis at mira, at anim na buwang nilalagyan ng pabango at iba pang pampaganda. Pagkatapos, isa-isa silang inihaharap sa hari.
2:13 Bago humarap sa hari, ibinibigay sa kanila ang lahat ng maibigan nilang dalhin sa pagharap sa hari.
2:14 Bawat isa'y magdamag na matutulog sa piling ng hari at kinabukasa'y dinadala sa tirahan ng mga asawa nito na pinamamahalaan ng eunukong si Sasgar. Sinumang makasiping ng hari ay hindi nakababalik sa palasyo kung hindi siya ipatatawag nito, lalo na kung hindi nasiyahan sa kanya ang hari.
2:15 Dumating ang araw ng pagharap ni Ester sa hari. Wala siyang hiniling maliban sa sinabi sa kanya ni Hegeo. At nabighani niya ang lahat ng nakakita sa kanya.
2:16 Buwan ng Tebet noon, ikasampung buwan ng ikapitong taon ng paghahari ni Asuero.
2:17 Lubos siyang nabighani kay Ester at inibig niya ito nang higit kaninumang babae. Kaya, siya'y kinoronahan nito at ginawang reyna, kapalit ni Vasti.
2:18 Nagpiging siya sa karangalan ni Ester at inanyayahan ng hari sa isang piging ang lahat niyang mga pinuno at mga tagapaglingkod. Kaugnay nito, nagpahayag pa siya ng pista opisyal sa buong kaharian at namigay ng maraming regalo. ( Iniligtas ni Mardoqueo ang Hari )
2:19 Si Mardoqueo ay nasa may pagpasok sa patyo ng palasyo nang muling tipunin ang mga dalaga.
2:20 Noon ay hindi pa rin ipinaaalam ni Ester ang lahi o pamilyang pinagmulan niya, tulad ng bilin ni Mardoqueo.
2:21 Isang araw samantalang nasa patyo ng palasyo si Mardoqueo, narinig niyang nag-uusap ang dalawang eunukong bantay. Sila'y sina Bigtan at Teres. Galit sila sa hari at balak nilang patayin ito.
2:22 Nang marinig ito ni Mardoqueo ay gumawa siya ng paraang makausap si Reyna Ester at sinabi rito ang kanyang narinig. Sinabi naman niya ito sa hari, pati ang tungkol kay Mardoqueo.
2:23 Ipinasiyasat ito ng hari at napatunayang totoo, kaya ipinabitay sina Bigtan at Teres. Ang pangyayaring ito'y itinala sa aklat-kasaysayan ng hari.
3:1 ( Binalak ni Haman na Lipulin ang mga Judio ) Pagkatapos ng mga pangyayaring ito, itinaas ni Haring Asuero sa tungkulin si Haman na anak ni Hamedata, isang Agageo. Ginawa niya itong punong ministro.
3:2 Lahat ng tauhan sa patyo ng palasyo ay yumuyukod at nagbibigay-galang kay Haman bilang pagsunod sa utos ng hari. Ngunit si Mardoqueo ay hindi man lamang yumuyukod.
3:3 "Tinanong siya ng mga tauhan sa patyo, 'Bakit ayaw mong sundin ang utos ng hari?'"
3:4 Araw-araw ay sinasabi nila ito sa kanya ngunit ayaw niyang makinig. Kaya isinumbong nila si Mardoqueo kay Haman para tingnan kung ano ang gagawin kay Mardoqueo, sapagkat sinasabi nitong siya'y Judio.
3:5 Nang mapatunayan ni Haman na hindi nga nagbibigay-galang sa kanya si Mardoqueo, sumilakbo ang kanyang galit.
3:6 Lalo siyang nagalit nang malaman niyang Judio si Mardoqueo. Sa palagay niya, hindi siya masisiyahan kung si Mardoqueo lang ang kanyang ipapapatay. Kaya umisip siya ng paraan upang maipapatay ang lahat ng Judio na sakop ni Haring Asuero.
3:7 Buwan ng Nisan, unang buwan ng ikalabindalawang taon ng paghahari ni Asuero. Ginawa sa harapan ni Haman ang sapalarang tinatawag na Pur upang malaman kung anong araw nararapat isagawa ang balak niya. Ang lumabas ay ang ikalabintatlong araw ng Adar, ang ikalabindalawang buwan.
3:8 "Pagkatapos nito, sinabi ni Haman sa Haring Asuero, 'Sa lahat po ng panig ng inyong kaharian ay may isang grupo ng mga taong ayaw makisama sa iba. May sarili silang batas at ayaw sumunod sa inyong utos. Hindi po makabubuti sa inyo, Kamahalan, kung pababayaan ninyo itong magpatuloy."
3:9 "Kung inyong mamarapatin, maglagda kayo ng isang utos para lipulin ang mga taong yaon. Magbibigay po ako ng 10,000 talentong pilak sa mga pinuno at ito'y ilalagak sa kabang-yaman ng hari.' "
3:10 Hinubad ng hari ang kanyang singsing na pantatak at ibinigay kay Haman.
3:11 "At sinabi sa kanya ng hari, 'Iyo na ang salapi mo at gawin mo ang gusto mong gawin sa mga taong iyon.' "
3:12 Nang ikalabintatlong araw ng unang buwan, ipinatawag ni Haman ang mga tagasulat ng hari. Pinagawa niya sila ng sulat para sa mga gobernador ng lahat ng lalawigan at sa mga pinuno ng bayan, sa wikang ginagamit sa lugar na padadalhan. Ang sulat ay ginawa sa pangalan ng Haring Asuero at tinatakan ng singsing nito.
3:13 Ang nilalaman ng liham ay isang utos na patayin ang lahat ng Judio---bata't matanda, lalaki't babae---at samsamin ang lahat nilang ari-arian. Isasagawa ito sa ikalabintatlo ng Adar.
3:14 Bawat lalawiga'y padadalhan ng sipi ng utos para makahanda ang lahat sa araw na nabanggit.
3:15 At ipinahayag sa Susan na siyang kabisera ng Persia ang utos ng hari. Ang mga lalawigan naman ay kaagad dinalhan ng kanilang sipi. Masayang nag-iinuman ang hari at si Haman, samantalang gulung-gulo ang buong Susan.
4:1 ( Pinakiusapan ni Mardoqueo si Ester na Mamagitan ) Nang malaman ni Mardoqueo ang tungkol sa sulat ni Haman, pinunit niya ang kanyang kasuutan. Nagdamit siya ng sako, naglagay ng abo sa ulo, at naglibot sa buong lunsod. Siya'y nananangis nang buong kapaitan.
4:2 Naupo siya sa labas ng pintuan ng palasyo sapagkat hindi pinapayagang pumasok ang sinumang nakasuot ng sako.
4:3 At ang mga Judio sa bawat lalawigang naabot ng utos ng hari ay nanangis nang buong kapaitan, nag-ayuno at nagluksa. Karamihan sa kanila'y nagdamit ng sako at naglagay ng abo sa ulo.
4:4 Nalaman ni Reyna Ester ang pangyayari nang sabihin sa kanya ng mga katulong niyang babae at ng mga eunuko. Kaya, pinadalhan niya ng bihisan si Mardoqueo, ngunit ayaw nitong kunin.
4:5 Dahil dito, ipinatawag niya si Hatac, isa sa mga eunuko ng hari at itinalagang katulong niya. Pinapunta niya ito kay Mardoqueo at ipinatanong kung bakit siya nagkakaganoon.
4:6 Pinuntahan naman ni Hatac si Mardoqueo sa labas ng palasyo.
4:7 Sinabi naman nito ang buong pangyayari pati ang halagang ibibigay ni Haman sa hari mapatay lamang ang mga Judio.
4:8 Binigyan pa siya ni Mardoqueo ng isang kopya ng sulat ng hari para ipakita kay Ester. Ipinakiusap pa niyang ipaliwanag kay Ester ang buong pangyayari at ipagbigay-alam sa hari.
4:9 Pagkatapos ng kanilang pag-uusap, nagbalik si Hatac kay Ester at isinaysay ang lahat ng sinabi ni Mardoqueo.
4:10 Si Hatac ay pinabalik ni Ester kay Mardoqueo at ganito ang ipinasabi:
4:11 '"Alam na alam ng lahat na ang batas ng kaharian ay walang itinatangi. Sinumang lumapit sa hari, maging lalaki o babae, nang hindi ipinatatawag ay papatayin maliban kung ipatong sa kanya ang gintong setro. At ako'y tatlumpung araw nang hindi ipinatatawag ng hari.' "
4:12 Nang matanggap ni Mardoqueo ang sagot ni Ester,
4:13 "ganito naman ang ipinasabi niya: 'Huwag mong aakalaing makaliligtas ka kahit ikaw ay asawa ng hari."
4:14 "Pag ipinagwalang-bahala mo ang pangyayaring ito, tiyak na may magliligtas din sa mga Judio ngunit ikaw at ang iyong angkan ay malilipol. Ano'ng malay mo? Baka nga napunta ka riyan para maging kasangkapan sa ganitong pagkakataon?' "
4:15 Dahil dito, ipinasabi ni Ester kay Mardoqueo,
4:16 '"Tipunin mo ang lahat ng Judio rito sa Susan at ipag-ayuno ninyo ako. Huwag kayong kakain o iinom sa loob ng tatlong araw. Mag-aayuno rin kami ng aking mga katulong na babae. Pagkatapos, lalapit ako sa hari kahit ito'y labag sa batas. Mamatay na kung mamamatay.'"
4:17 Umalis si Mardoqueo at ginawa ang lahat ng sinabi ni Ester.
5:1 ( Piniging ni Ester ang Hari at si Haman ) Lumipas ang tatlong araw mula nang mag-usap sina Ester at Mardoqueo. Isinuot ni Ester ang kanyang kasuutan bilang reyna at tumayo sa bulwagan ng palasyo, sa tapat ng tirahan ng hari. Nakaluklok noon sa trono ang hari, paharap sa pintuan ng palasyo.
5:2 Nalugod siya nang makita si Ester at itinuro niya rito ang kanyang setro. Lumapit naman si Ester at hinipo ang dulo ng setro.
5:3 "Itinanong ng hari, 'Bakit, aking reyna? Sabihin mo kung ano ang ibig mo at ibibigay ko sa iyo kahit ang kalahati ng aking kaharian.' "
5:4 "Sumagot si Ester, 'Kung mamarapatin ng mahal na hari, inaanyayahan ko kayo at si Haman sa isang piging na inihanda ko para sa inyong karangalan.' "
5:5 "Sinabi ng hari, 'Tawagin agad si Haman para masunod ang ibig ni Ester.' Dumalo nga ang hari at si Haman sa piging ni Ester."
5:6 "Habang sila'y nag-iinuman, tinanong ng hari si Ester, 'Ano ba ang gusto mo? Sabihin mo't ibibigay kong lahat kahit ang kalahati ng aking kaharian.' "
5:7 "Sinabi ni Ester, 'Ito po ang aking kahilingan:"
5:8 "Kung ako po'y kalugud-lugod sa hari, at kung inyong mamarapatin, inaanyayahan ko uli kayo ni Haman sa isang piging bukas. Doon ko po sasabihin ang aking kahilingan.' ( Nagpagawa si Haman ng Pagbibitayan )"
5:9 Nang araw na yaon, masayang-masayang lumabas ng palasyo si Haman. Ngunit sumilakbo na naman ang kanyang galit nang madaanan niya si Mardoqueo sa may pintuang papasok sa palasyo. Hindi na naman siya niyukuran man lang.
5:10 Gayunman, nagpigil siya at tuluy-tuloy na umuwi. Pagdating ng bahay, tinawag niya si Zeres na kanyang asawa at ang kanyang mga kaibigan.
5:11 Ipinagparangalan niya sa mga ito ang kanyang kayamanan, mga anak, ang pagkataas sa katungkulan, pati ng pagkalagay sa kanya bilang pinakamataas sa mga pinuno at kagawad sa palasyo.
5:12 "Idinugtong pa niya, 'At ako lamang ang inanyayahan ni Reyna Ester na sumama sa hari nang pigingin niya ito. Bukas, iniimbita na naman niya ako, kasama ang hari."
5:13 "Gayunman, walang halaga ang lahat ng ito hangga't nakikita ko ang Judiong si Mardoqueo.' "
5:14 "Sinabi sa kanya ng asawa niya't mga kaibigan, 'Bakit di ka magpagawa ng bitayan na pitumpu't limang talampakan ang taas? At bukas ng umaga, hilingin mo sa hari na bitayin si Mardoqueo.' Nagustuhan ito ni Haman, kaya nagpagawa siya ng bitayan."
6:1 ( Pinarangalan si Mardoqueo ) Isang gabi, hindi makatulog si Haring Asuero. Ipinakuha niya ang aklat ng mahahalagang pangyayari sa kaharian at ipinabasa ito habang siya'y nakikinig.
6:2 Nabasa ang bahagi ng kasaysayan tungkol sa pagkatuklas ni Mardoqueo sa masamang balak nina Bigtan at Teres na patayin ang Haring Asuero.
6:3 "Dahil dito, itinanong ng hari, 'Anong gantimpala o pagpaparangal ang ginawa kay Mardoqueo dahil sa kabutihang ginawa niya sa akin?' Sumagot ang mga tagapaglingkod, 'Wala po.' "
6:4 '"Sino iyong pumapasok sa bulwagan?' paibang tanong ng hari. Noon ay pumapasok sa bulwagan si Haman upang sabihin sa haring yari na ang pagbibitayan kay Mardoqueo. "
6:5 "Sinabi ng mga tagapaglingkod ng hari, 'Si Haman po.' At sinabi ng hari, 'Palapitin ninyo.' "
6:6 "Lumapit naman si Haman. Itinanong sa kanya ng hari, 'Ano ang mainam na gawin sa sinumang ibig parangalan ng hari?' Akala ni Haman ay siya ang tinutukoy ng hari,"
6:7 "kaya sinabi niya, 'Ganito po:"
6:8 Ipakuha ninyo ang damit ninyong isinuot at ang kabayong sinakyan nang kayo'y putungan bilang hari.
6:9 "Ang damit ay ibigay sa isa sa mga pangunahing pinuno ng kaharian para isuot sa pararangalan. Pagkatapos, isakay sa kabayo at ilibot sa buong lunsod habang isinisigaw ang: 'Ito ang lalaking pinararangalan ng hari!'' "
6:10 "Sinabi ng hari kay Haman, 'Kung gayon, kunin mo ang aking damit at ang aking kabayo. Lahat ng sinasabi mo'y gawin mo kay Mardoqueo, ang Judiong nakaupo sa pintuan ng palasyo.' "
6:11 "Kinuha nga ni Haman ang damit at ang kabayo ng hari. Binihisan niya si Mardoqueo, isinakay sa kabayo at inilibot sa buong lunsod habang isinisigaw niyang, 'Narito ang lalaking pinararangalan ng hari.' "
6:12 Pagkatapos ng parada, si Mardoqueo'y nagbalik sa pintuan ng palasyo. Nagmamadali namang umuwi si Haman, nanangis at nakatalukbong dahil sa hiya at sama ng loob.
6:13 "Ang nangyari'y isinalaysay ni Haman sa asawa niyang si Zeres at sa kanyang mga kaibigan. Sinabi ng mga ito sa kanya, 'Kung Judio nga si Mardoqueo, hindi mo siya madadaig, manapa'y ikaw ang madaig niyon.' "
6:14 Nag-uusap pa sila nang dumating ang mga sugo ng hari at nagmamadaling isinama si Haman sa piging ni Ester.
7:1 ( Binitay si Haman ) Si Haring Asuero at si Haman ay dumalo sa ikalawang piging ni Reyna Ester.
7:2 "Samantalang sila'y nag-iinuman, itinanong ng hari, 'Reyna Ester, ano nga ba ang hihilingin mo? Sabihin mo at ibibigay ko sa iyo, kahit ang kalahati ng aking kaharian.' "
7:3 "Sumagot si Reyna Ester, 'Kung nakalulugod ako sa inyo, Mahal na Hari, at kung inyong mamarapatin ay iligtas ako at ang aking lahi."
7:4 "Ako po at ang aking lahi ay ipinagbili upang lipulin. Kung kami'y ipinagbili para maging alipin lamang, magsasawalang-kibo na po ako sapagkat ang daranasin naming hirap ay alangang itumbas sa magiging abala ninyo sa pagliligtas sa amin.' "
7:5 "Itinanong ng hari, 'Sinong umisip na gumawa nito? Saan siya naroroon ngayon?' "
7:6 "Sumagot si Ester, 'Isa po siyang kaaway, si Haman!' At si Haman ay nangatog sa takot sa harap ng hari at ng reyna."
7:7 Galit na galit na nagtindig ang hari at nagpunta sa hardin. Naiwan naman si Haman at nagmakaawa kay Reyna Ester sapagkat parang nakikini-kinita na niya ang gagawin sa kanya ng hari dahil sa matinding galit nito.
7:8 "Nang magbalik ang hari, nakita niyang nakadapa si Haman sa likmuang kinahihiligan ng reyna. Dahil dito'y pagalit na sinabi ng hari, 'Pagbabalakan pa niya ng masama ang reyna, sa loob pa naman ng aking pamamahay?' Hindi pa halos natatapos ang salita ng hari, si Haman ay sinunggaban na ng mga tagapaglingkod at inilabas na may takip ang mukha. "
7:9 "Nang magkagayon, sinabi ni Harbona, isa sa mga tagapaglingkod ng hari, 'Nagpagawa si Haman ng isang bibitayan para kay Mardoqueo na nagligtas sa buhay ninyo, mahal na hari. Ang taas po ng bibitayan ay pitumpu't limang talampakan at naroon sa tabi ng kanyang bahay.' "
7:10 '"Doon siya bitayin!' utos ng hari. Binitay nga roon si Haman at napawi na ang galit ng hari."
8:1 ( Hinirang si Mardoqueo ) Nang araw ring yaon, ang mga ari-arian ni Haman ay ibinigay ni Haring Asuero kay Reyna Ester. At napabilang na si Mardoqueo sa mga kagawad na malapit sa hari sapagkat sinabi na ni Ester na magkamag-anak sila.
8:2 Ang singsing na pantatak ng hari ay kinuha kay Haman at ibinigay kay Mardoqueo na siyang ginawang katiwala ni Ester sa dating bahay ni Haman. ( Ang Bagong Kahilingan ni Ester )
8:3 Minsan pang lumapit si Ester sa Haring Asuero at lumuluhang idinulog dito ang utos tungkol sa paglipol sa mga Judio na binalak ni Haman.
8:4 Itinuro ng hari ang kanyang setro kay Ester. Tumindig naman si Ester at kanyang sinabi,
8:5 '"Kung mamarapatin ninyo at makalulugod sa inyo, Kamahalan, nais kong hilingin na inyong pawalang-bisa ang utos na pinakalat ni Haman laban sa mga Judio sa kaharian."
8:6 "Hindi ko po matitiis kung malilipol ang aming lahi.' "
8:7 "Sinabi ng Haring Asuero sa Reyna Ester, 'Ang ari-arian ni Haman ay ibinigay ko na sa iyo. Ipinabitay ko na si Haman dahil sa masama niyang balak sa mga Judio.'"
8:8 "Pagkatapos, sinabi kay Mardoqueo, 'Gumawa ka ng isang utos tungkol sa mga Judio kung anuman ang gusto mong isulat. Ito'y sa pangalan ko, at tatakan mo ng aking singsing.' Ang utos na tinatakan ng singsing ng hari ay hindi mapawawalang-bisa. "
8:9 Nang ikadalawampu't tatlo ng Sivan, ang ikatlong buwan, ipinatawag na lahat ang mga tagasulat ng hari. Idinikta ni Mardoqueo sa kanila ang isang liham upang ipadala sa mga gobernador at mga tagapangasiwa ng 127 lalawigan, mula sa India hanggang Etiopia. Ang sulat ay ginawa sa wikang ginagamit sa lugar na padadalhan.
8:10 Ang sulat na ito ay sa pangalan ni Haring Asuero, at may tatak ng singsing nito. Pagkatapos, ipinadala sa mga tagahatid-sulat, sakay ng mabibilis nilang kabayo.
8:11 Sa pamamagitan ng sulat na iyon, ipinahintulot ni Haring Asuero na magsama-sama ang mga Judio upang ipagtanggol ang kanilang sarili laban sa sinumang sasalakay sa kanila. Maaari nilang patayin o lipulin ang sinumang sasalakay sa kanila, at pagkatapos ay samsamin ang kanilang ari-arian.
8:12 Gagawin nila ito sa buong kaharian sa loob ng isang araw, sa ikalabintatlo ng Adar, ang ikalabindalawang buwan ng taon.
8:13 Bawat lalawigan ay padadalhan ng sipi nito at ipapahayag sa lahat ng tao para makapaghanda ang mga Judio sa araw na yaon laban sa kanilang mga kaaway.
8:14 Kaya, ang mga tagahatid-sulat ay nagmamadaling lumakad, sakay ng mabibilis na kabayo ng hari at sinunod agad ang utos ng hari. Ang utos ay ikinalat din sa Lunsod ng Susan.
8:15 Nang lumabas ng palasyo si Mardoqueo, ipinagbunyi siya ng buong Lunsod ng Susan. Suot niya ang maharlikang kasuutan: puti't asul ang kanyang damit, pinong lino na kulay-ube ang balabal, at malaki ang koronang ginto.
8:16 Ito'y malaking karangalan ng mga Judio. Masayang-masaya sila.
8:17 Sa lahat ng dakong naabot ng utos ng hari, nagpista sa tuwa ang mga Judio. At sa buong kaharian, marami ang nagsabing sila'y Judio sa takot na sila'y patayin.
9:1 ( Nilupig ng mga Judio ang Kanilang mga Kaaway ) Dumating ang ikalabintatlo ng Adar. Ito ang araw ng pagsasagawa ng utos ng hari, ang araw na inaasam-asam ng mga kaaway ng mga Judio sapagkat inaasahan nilang sa araw na ito nila lilipulin ang mga Judio. Ngunit hindi nila alam na mababaligtad ang pangyayari, sapagkat sila ang lilipulin ng mga Judio.
9:2 Nang araw na yaon, ang lahat ng Judio sa buong kaharian ay nagsama-sama upang patayin ang sinumang mananakit sa kanila. Ngunit wala namang nangahas magbuhat ng kamay sa kanila pagkat natakot sa kanila ang lahat.
9:3 Tinulungan pa sila ng mga gobernador at ng lahat ng pinuno sa bawat lalawigan dahil naman sa takot kay Mardoqueo
9:4 na noon ay isa nang malaking tao sa kaharian. Bantog na sa buong kaharian ang kanyang pangalan at patuloy pang lumalaki ang kanyang kapangyarihan.
9:5 Nilipol nga ng mga Judio ang kanilang mga kaaway at ginawa nila ang kanilang gusto sa lahat ng napopoot sa kanila.
9:6 Sa lunsod lamang ng Susan, 500 ang kanilang napatay.
9:7 Kasama sa napatay sina Parsandata, Dalfon, Aspata,
9:8 Porata, Adalia, Aridata,
9:9 Parmasta, Arisai, Aridai at Vaizata,
9:10 mga anak ni Haman. Ngunit hindi nila ginalaw ang ari-arian ng mga kaaway nila.
9:11 Nang araw ring yaon, umabot sa kaalaman ng hari ang bilang ng napatay sa Lunsod ng Susan.
9:12 "Sinabi ng hari kay Reyna Ester, 'Sa Susan lamang, 500 na ang napatay bukod sa sampung anak ni Haman. Ano kaya ang nangyari sa ibang lalawigan? Ngayon, sabihin mo sa akin kung ano pa ang gusto mo at ibibigay ko sa iyo.' "
9:13 "Sinabi ni Ester, 'Kung mamarapatin ng hari ay pahintulutan ang mga Judio rito sa Susan na ituloy hanggang bukas ang inyong utos. At kung maaari, ipabitin sa bitayan ang bangkay ng mga anak ni Haman!' "
9:14 Iniutos nga ng hari na ibitin ang bangkay ng sampung anak ni Haman.
9:15 Kinabukasan, muling nagsama-sama ang mga Judio sa Susan at nakapatay pa sila ng 300. Hindi rin nila ginalaw ang kanilang ari-arian.
9:16 Ang mga Judio sa iba't ibang panig ng kaharian ay nagsama-sama rin at nilupig ang kanilang mga kaaway. Umabot sa 75,000 ang kanilang napatay ngunit hindi nila ginalaw ang ari-arian ng mga ito.
9:17 Ito'y ginawa nila nang ikalabintatlo ng Adar. At nang ikalabing-apat, namahinga sila at maghapong nagdiwang.
9:18 Sa Lunsod ng Susan, dalawang araw na nanlupig ang mga Judio, ikalabintatlo at ikalabing-apat. Ikalabinlima nang sila'y tumigil at nagdiwang na maghapon.
9:19 Samakatwid, ang mga Judio sa labas ng Susan ay nagdiwang nang ikalabing-apat ng Adar. Maghapon silang nagpista at nagbigayan ng mga piling regalo.
9:20 Ang mga pangyayaring ito'y itinala ni Mardoqueo at sinulatan niya ang lahat ng Judio sa kaharian ni Haring Asuero, maging malayo o malapit.
9:21 Itinagubilin niya na aalalahanin taun-taon ang ikalabing-apat at ikalabinlima ng Adar.
9:22 Ito'y dapat nilang itangi sapagkat sa mga araw na ito nila nilupig ang kanilang mga kaaway. Sa halip na sila ang patayin, sila ang lumipol sa kanilang mga kaaway. Ang kalungkutan nila'y naging kasayahan at naging pagdiriwang ang pananamlay. Sa mga araw na nabanggit, dapat silang magdiwang at magbigayan ng mamahaling regalo.
9:23 Ang pagdiriwang na ito ay gagawin nila taun-taon, ayon sa sulat ni Mardoqueo.
9:24 Ang paglipol na ito sa mga kaaway ay ginawa ng mga Judio dahil sa masamang balak ni Haman na sila'y lipulin. Natakda ang petsa ng paglipol sa pamamagitan ng sapalarang tinatawag na Pur.
9:25 Ngunit nabaligtad nga ang lahat nang umabot ito sa kaalaman ni Haring Asuero sa pamamagitan ni Reyna Ester. Nang malaman ito ng hari, nagpakalat siya ng sulat at iniutos na kay Haman gawin ang masamang balak nito sa mga Judio. Ipinabitay pa nga siya ng hari.
9:26 Kaya, ang pistang ito'y tinawag nilang Pista ng Purim, buhat sa salitang Pur. At dahil nga sa utos na ito ni Mardoqueo at sa pagkaligtas nila sa panganib,
9:27 ipinasiyang ipagdiwang ang dalawang araw na ito taun-taon. Ito'y gagawin nila, ng kanilang lahi at ng lahat ng mapapabilang sa kanila.
9:28 Patuloy itong aalalahanin ng lahat ng salin ng kanilang lahi, ng bawat sambahayan sa lahat ng lalawigan at lunsod. Hindi nila ito kaliligtaan, hindi rin ititigil.
9:29 Upang patibayan ang sulat ni Mardoqueo tungkol sa Purim, si Reyna Ester ay sumulat sa
9:30 lahat ng lalawigang sakop ni Haring Asuero. Magiliw niyang ipinakiusap
9:31 na ang Purim ay ipagdiwang ng lahat sa takdang panahon tulad ng ipinahayag ni Mardoqueo. Sinabi rin niya sa sulat na sila'y mag-ayuno at managhoy sa mga araw na nabanggit, para sa kanilang sarili at sa kanilang mga anak.
9:32 Ang sulat ni Ester ang siyang nagpatibay sa pagganap ng Pista ng Purim, at ito'y itinala sa isang aklat.
10:1 ( Ang Kadakilaan ni Mardoqueo ) Ang lahat ng nasasakupan ni Haring Asuero ay sapilitan niyang pinagbabayad ng buwis, pati ang maliliit na pulo.
10:2 Ang kapangyarihan ng hari, ang lahat ng ginawa niya, pati ng pagkataas sa katungkulan ni Mardoqueo at ang malaking karangalang ibinigay niya rito ay pawang nakasulat sa Aklat-kasaysayan ng Hari ng Media at Persia.
10:3 Si Mardoqueo, ang punong ministro ng Haring Asuero ay mahal na mahal ng taong bayan sapagkat wala siyang inisip kundi ang kanilang kapakanan at kabutihan.