Ŭonbulismo estas religio fondita de Sotesano en Koreio. Ĝi ekis per lia granda iluminiĝo en la 28a de aprilo 1916. Ĝi celas konduki ĉiujn vivulojn al paradizo, pligrandigante spiritan potencon kaj venkante materian potencon per verreligia kredo kaj realmorala trejno. Ĝi, surbaze de budhismo, integrigas kaj utiligas ankaŭ la instruojn de ĉiuj religioj por fariĝi perfekta religio. Ĝi substrekas ĝisdatigi, vivutiligi kaj popularigi budhismon.
Fondinto Sotesano
La fondinto de ŭonbulismo estas Sotesano. Lia familia nomo estas BAK, lia persona nomo Ĝungbin kaj lia respekta titolo Deĝongsa, kiu signifas grandan majstron. Sotesano estas lia alnomo. Li naskiĝis kiel filo de ordinara kamparano la 5an de majo 1891 en Koreio.
Ekde la 6a aĝo li aparte scivolis pri la naturaj fenomenoj kaj homaj aferoj. Kun la tempo pli kaj pli vekiĝis liaj demandoj kaj li strebadis solvi ilin. Dum 16jaroj, li penis renkonti montodion kaj majstron, sed vane. Tial, li dronis en profunda medito. Kiam li sidis silenta frumatene en la 28a de aprilo 1916, subite klariĝis lia spirito kaj estiĝis nova energio. Ĉiuj demandoj do solviĝis unu post la alia. Li jene esprimis la veron, pri kiu li iluminiĝis meminstruite: "Ĉiuj estaĵoj enestas en unu esenco kaj ĉiuj instruoj devenas de unu fonto, en kio la vojo de eterno kaj la principo de karmo fundamentas unu la alian kaj formas unu rondaĵon." Li fine atingis grandan iluminiĝon kaj aspiris instrui homojn sub la slogano: "Jam progresas materio, ni disvolvu la spiriton."
En 1924 oficiale publikiĝis la fondo de ŭonbulismo. Li, 52-jara, forpasis la unuan de junio 1943.
Doktrino
La formiĝon de la doktrino de ŭonbulismo karakterizas tio, ke ĝia fondinto Sotesano mem la doktrinon verkis en la unuaj jaroj, provis tra multaj jaroj kaj definitive elfaris antaŭ sia morto. Ŭonbulismo ne akceptas la solan Dion personigitan, sed la veron, kiu trapenetras la universon. La doktrinon de ŭonbulismo karakterizas tio, ke ĝi integrigas kaj utiligas precipe budhismon kaj ankaŭ la instruojn de ĉiuj aliaj religioj.
La doktrino de ŭonbulismo, surbaze de la vero de Ilŭonsang, konsistas el la du pordoj de kredo kaj praktikado. La pordo de kredo traktas rilatojn kun aliulo por interkonformigo. La darmkorpa budho Ilŭonsang reale aperas en la bonfaroj de ĉielo-tero, gepatroj, kunvivuloj kaj leĝoj. Ĉiuj estaĵoj en la mondo estas ligitaj esence per reciproka bonfaro. Ŭonbulano konscias ilian bonfaron kaj rekompencas ilin. Danko estas la plej grava en lia vivo. Ŭonbulismo realigas egalan kaj pacan socion per la kvar nepraĵoj: kreskigo de propra forto, unuaigo al saĝulo, eduko de aliula infano kaj estimo al sindediĉulo.
La pordo de praktikado traktas rilatojn kun memo por sinperfektigo. Ŭonbulano por perfektigi sian personecon ĉiutage faras la tri studojn: spiritan kultivon, aferan-principan esploron kaj justagan elekton. Por tio li akcelas kredon, sinkuraĝigon, scivolon kaj penadon kaj forigas nekredon, avidon, maldiligenton kaj malsaĝon. Tiamaniere li celas havigi al si la personecon kaj povon de budho. La kvar devizoj de ŭonbulismo estas ĝustaj iluminiĝo kaj ago, pribonfara konscio kaj danko, utiligo de la budha darmo kaj sindonema servo al publiko.
Historio
Ŭonbulismo ekis per la granda iluminiĝo de Sotesano en la 28a de aprilo 1916. En 1924 establiĝis la centra sidejo de ŭonbulismo en Iksan.
Ĝongsano, alnomo de SONG Gju, heredis la aŭtoritaton de Sotesano. Li fondis diversajn lernejojn, inkluzive la universitaton Wonkwang en 1946, kie ankaŭ la ŭonbulanaj pastroj sisteme edukiĝis. Li deklaris la religian nomon ŭonbulgjo (ŭonbulismo) en 1947 kaj gvidis helpon al militsuferintoj. Li verkis la libron Ŝtatkonstruado, en kiu li skribis kiel gvidi kaj progresigi ŝtaton. En 1961 li proklamis la trisaman moralon, kiu temas pri unu principo, unu familio kaj unu laboro. Li forpasis en 1962.
Ĝongsanon sekvis kiel la ĉefmajstro (eklezia estro) de ŭonbulismo Desano, alnomo de GIM Dego. Li ekvilibre progresigis edifon, edukon kaj karitaton kaj klopodis disvastigi ŭonbulismon eksterlande. Dum lia gvidado ŭonbulismo fariĝis la sesa granda religio en Koreio. Kiel la triopan movadon por monda paco li proponis menskampan kultivon, tutmonde komunan merkaton kaj unuiĝintan religiaron. Li dediĉis sin al ŭonbulana trejnado kaj interreligia kunlaboro. Li transdonis la ĉefmajstrecon al Ĝŭasano en 1994 kaj forpasis en 1998.
Ĝŭasano, alnomo de I Gŭangĝong elektiĝis kiel la kvara ĉefmajstro en 1994. Li dediĉas sian forton por reordigi organizan sistemon, stabiligi ekonomian bazon, traduki la sanktajn librojn, establi radiostacion, disvastigi ŭonbulismon eksterlande kaj disvolvi kulturon. Li klinas sian atenton ankaŭ al la internacia lingvo Esperanto. En 1998 sub lia spirita gvido eldoniĝis La Sankta Instruo de Ŭonbulismo en Esperanto, la baza sankta libro de ŭonbulismo.
Disvastiĝo
Dekomence funkcias demokratie la eklezio de ŭonbulismo, kiun konsistigas la centra sidejo, temploj kaj diversaj organizoj. La centra sidejo troviĝas en Iksan, Koreio kaj estas la kerno de administrado kaj kredo. La eklezia estro nomiĝas ĉefmajstro, ĝongbopsa en la korea, kaj elektiĝas en ĉiu sesa jaro. En 1998 estas 12 ekleziaj distriktoj kun 448 temploj en Koreio kaj 3 eksterlandaj distriktoj kun 31 temploj en Argentino, Aŭstralio, Ĉinio, Francio, Germanio, Japanio, Kanado, Kazaĥio, Nov-Zelando, Rusio, Sud-Afriko kaj Usono. Krom tio estas centoj da edukaj, karitataj kaj industriaj organizoj. Nun ŭonbulismo kun pli ol miliono da kredantoj estas la sesa granda religio en Koreio kaj strebas al sia tutmondiĝo.
Agado
Ŭonbulismo bonfaras al la homaro en la tri ĉefaj kampoj de sia agado: edifo, eduko kaj karitato. Edifon plenumas precipe la ŭonbulanaj temploj. La eklezio sin dediĉas al eduko, havante 3 universitatojn, 8 mez- kaj supermezlernejojn kaj 131 infanĝardenojn.
Karitato protektas homojn spirite, korpe aŭ finance helpobezonajn kaj kuraĝigas ilin memstariĝi. La eklezio por karitata agado fondis 17 domojn por maljunuloj, malsanuloj, senhejmuloj kaj sengepatraj infanoj kaj malfermis 8 socibonfartejojn precipe por lokaj malriĉuloj. Plie funkcias hospitaloj kaj orientmedicinaj klinikoj, kiuj regule faras ankaŭ senpagan medicinan servon al lokaj civitanoj. La eklezia bonfara movado etendiĝas al la donaco de sango kaj korpaj organoj, al la senpaga operacio de kormalsanaj infanoj kaj al la vesta-nutraĵa donaco al la tria mondo.
Krom tio la eklezio aktivas en trejnado, kulturo, arto, eldonado, scienco, industrio ktp. Ĝi konstruis 12 trejnejojn, kie ŭonbulanoj periode trejniĝas por sin kultivi, kaj cele al la financa memstareco funkciigas rizkampon, fruktejojn, farmacian fabrikon, bankon, asekuran firmaon, presejon kaj aliajn. Ĉi ĉio plenumiĝas sub la spirito kunfari laboron kaj studon.
La eklezio aktive partoprenas en interreligia kunlaboro enlande kaj internacie. Ĝi membras en Azia Konferenco de Religio kaj Paco (ACRP), Monda Konferenco de Religio kaj Paco (WCRP), Monda Gefrataro de Budhismo (WFB), Internacia Asocio de Religia Libereco (IARF) kaj la Neregistaraj Organizoj (NGOs) de UN.
Centra sidejo de ŭonbulismo
"Eksteren, estonten, socien, almonden!"
La supra slogano estas donita de Ĝŭasano por la eklezia agado. La centra sidejo de ŭonbulismo situas en la urbo Iksan, Koreio kaj estas la eklezia kerno de kredo kaj administrado. En ĝi nestas gravaj ekleziaj instancoj. La centra sidejo establiĝis en 1924. En ĝi konserviĝas historiaj spuroj de la eklezia komenco. Krome, en la centra sidejo troviĝas la turtomboj de Sotesano kaj de Ĝongsano, la historia muzeo de ŭonbulismo kaj la domo de la duonjarcenta jubileo. La centra sidejo estas ne nur grava pilgrimejo de ŭonbulanoj, sed ankaŭ agrabla promenejo de urbanoj, ĉar ĝia tereno estas malfermita kaj parke belaranĝita.
Rilatoj de Ŭonbulismo kaj Homaranismo
Homaranismo kaj Ŭonbulismo
La ideo de Zamenhof pri homaranismo estis bone kaj koncize klarigita en antaŭparolo de la broŝureto 'Homaranismo', presita sen aŭtora nomo, en Peterburgo en 1906. En ĝi Zamenhof diris : "La homaranismo estas instruo, kiu ne deŝirante la homon de lia natura patrujo, nek de lia religianaro, donas al li la eblon eviti ĉian malverecon kaj kontraŭparolon en siaj nacia-religiaj principoj kaj komunikigadi kun homoj de ĉiuj lingvoj kaj religioj sur fundamento neŭtrale homa, sur principoj de reciproka frateco, egaleco kaj justeco." Nun en la koroj de esperantistoj vivas la homaranismo de Zamenhof. En iu senco, la renkontiĝo de ideoj de Homaranismo kaj Ŭonbulismo povus esti natura.
Sotesano diris sian garandan memiluminiĝon jene : "Ĉiuj estaĵoj enestas en unu esenco kaj ĉiuj instruoj devenas de unu fonto, en kio la vojo de eterno kaj la principo de karmo fundamentas unu la alian kaj formas unu rondaĵon." Li memsciis la fakton, ke la vero de Ilŭonsang estas fundamenta principo de ĉiuj estaĵoj en la universo kaj ĉiuj leĝoj. En universo estas miloj da veroj kaj ideoj, tamen la ultimata principo estas unu. Kvankam ĉiuj religioj havas siajn apartajn kredobjektojn kaj nomojn, tamen la ultimata realaĵo estas unu, kiun ili esprimas en diversaj manieroj. Kaj oni diras, ke la vero, kiun ĉiuj budhoj kaj sanktuloj eksciis, estas unu. Tion ŭonbulanoj diras kiel ismo de Ilŭon. La ismon de Ilŭon heredis la 2a ĉefmajstro, kiu progresigis ĝin kiel la trisaman moralon, kiu temas pri unu principo, unu familio kaj unu laboro. La 3a ĉefmajstro plikonkretigis ĝin kiel movadon por unuiĝintaj religiaroj. La ideo de Homaranismo de Zamenhof vivas en koroj de esperantistoj, kaj la ideo de Ilŭonismo spiras en la vivo de ŭonbulanoj.
Enkonduko kaj statuso de Esperanto en la eklezio
En printempo de 1980 HONG Sungcho gvidis Esperanto-kurson por junuloj de la templo Ĝongno en Seulo. Ĝi estis la unua Esperanto-kurso en la eklezio de ŭonbulismo. Li kun la kursfinintoj fondis Rondon Cirklo en la 14a de junio 1980, celante disvastigi ŭonbulismon inter esperantistoj kaj Esperanton inter ŭonbulanoj. La templa junulara movado forte ligiĝis al la Esperanto-movado.
Rondo Cirklo organizis kursojn, partoprenis diversajn enlandajn Esperanto-aranĝojn, gastigis nemalmultajn eksterlandajn esperantistojn, ktp. La agadon finance kaj morale subtenis la tiamaj ĉefpastroj de la templo, el kiuj estas interalie Ĝŭasano, la nuna ĉefmajstro de ŭonbulismo. Dank'al li, en 1985 eldoniĝis Gvidlibro de Ŭonbulgjo kun 500 ekzempleroj, en 1988 La Fundamenta Instruo de Ŭonbulismo kaj La Sankta Instruo de Ŭonbulismo, kiuj estis tradukitaj de CHOE Taesok. Kaj ankaŭ tiuj sanktaj libroj estis tradukitaj en diversaj landaj lingvoj. Intertempe, la eklezio atentas agadojn de ŭonbulanaj esperantistoj, kiuj daŭre klopodas por pli studi esperanton kaj propagandi ŭonbulismon al enlandaj kaj eksterlandaj esperantistoj. Pasinta jare, universitato Wonkwang adoptis esperanton kiel duan fremdan lingvon.
Ĉefmajstro Ĝŭasano kaj esperanto
(1) Prediko en la UN
Nuna ĉefmajstro Ĝŭasano Predikis en la UN la 22an de septembro 1995, memore al la 50-jara jubileo pri "Interreligia Kunlaboro por la Konstruo de Monda Komunumo"
Jen estas la kerno de la prelego.
Esperanto estu la komuna lingvo por la tuta homaro
"... Krome, necesas alpreni la komunan lingvon por formi unu familion de la mondo. Mi proponas, ke la lingvo estu Esperanto plej logika kaj scienca, por ke niaj postaj generacioj ne suferu de lingvaj malfacilaĵoj. Esperanto estas la lingvo lernebla facile en kelkaj monatoj kaj apartenanta al nenies nacio. Tial ni povas akcepti ĝin kiel la lingvon de ni ĉiuj. Do oni parolu du lingvojn: gepatran lingvon kaj Esperanton. Se niaj idaroj libere interkomunikiĝos kaj harmonie kunvivos, tio estos la plej mallonga vojo al la tutmonda familiiĝo en egaleco kaj sen privilegio de ajna klaso. Mi pensas, ke la projekto plenumiĝos facile, se ni entreprenos ĝin por 30 aŭ 50 jaroj kaj unuopaj ŝtatoj kaj nacioj prepariĝos ene de tiuj jaroj..."
- El la prediko de la nuna ĉefmajstro -
(2) Gratulparolo de la 27a Korea Esperanto-Kongreso
Misio de esperantistoj.
"Iuj proponas iun specifan nacian lingvon por komuna lingvo, sed ni ne povas ne atentigi la malavantaĝojn de tio. Se iu specifa nacia lingvo estos elektita kiel komuna lingvo, alilingva kulturo estos trudita, tiel ke povos estiĝi tiel nomata "kultura kolonio". Krome, jam ekzistantaj naciaj lingvoj formiĝis spontane, tial ili estas tre komplikaj kaj iliaj principoj kaj reguloj ne estas klaraj, tiel ke ilin lerni estas ege malfacile. Adopti tian lingvon kiel komunan lingvon estas afero tro ŝarĝa kaj peniga al niaj sekvaj idaroj.
Tial estas tute nature, ke ni devas adopti kiel mondan komunan lingvon tian lingvon, kiu estas la plej logika, havas klarajn principojn kaj regulojn, ne apartenas al iu ajn specifa nacio, do estas akceptebla kiel nia propra lingvo, kaj estas facile lernebla por iu ajn. Ja Esperanto, kiu havas tiajn kondiĉojn, povas esti alternativo.
Esperanto havas tute pravan kialon kaj praktikan valoron, tial nepre realiĝos la volo. Mi deziras, ke vi konstante klopodu kun memkonvinkiĝo. Mi do finas mian parolon, dezirante ke rapide venu tiu tago, kiam rezulte de viaj klopodoj Esperanto estos definitive adoptita kiel monda komuna lingvo kaj ĉiuj gefratoj en la mondo ĝuos agrablan interparolon en Esperanto."
- El la prediko de la nuna ĉefmajstro -
(3) Progresiga tabelo de esperanto
Je la lasta tago(1998. 9. 27) de renkontiĝo, kiun junulara organizo de ŭonbulismo okazigis, ĉefmajstro Ĝŭasano predikis pri progresiga tabelo de esperanto, kiun li dividis 6 ŝutupe. Jen estas konciza enhavo
- 1a ŝutupo : Adopti esperanton kiel komunan lingvon en eŭropo
- 2a ŝutupo : Adopti esperanton kiel tutmondan komunan lingvon
- 3a ŝutupo : Prepara periodo dum 20-30 jaroj
- 4a ŝutupo : Stimultana tradukado per esperanto kaj angla lingvo en internacia
konferenco
- 5a ŝutupo : Nura uzado de esperanto kaj konstituo de normaj vortoj je diversaj
specialaj kampoj
- 6a ŝutupo : Uzado de esperanto je ĉiuj edukoj en ĉiuj landoj(ekskluzivas klason de
nacia lingvo)
- El la prediko de la nuna ĉefmajstro -
Progreso de esperanto kaj edifo de ŭonbulismo
Eduko de esperanto kaj eldono de gazeto
Plej grava afero en nuna situacio estas eduko de esperanto por rezervataj pastroj de ŭonbulismo. Estas necese enkonduki esperanto-klason en instruplano de rezervataj pastroj. Se ili lernas esperanton, ili tre multe kontribuos ne nur por esperanto-movado, sed ankaŭ por edifo kaj propagando de ŭonbulismo tra la mondo.
En decembro 1980 la rondo eldonis sian organon La Cirklo en Esperanto kaj entute aperis 9 numeroj ĝis 1983. La organo celis precipe eksterlandajn esperantistojn por informi ilin pri ŭonbulismo. Ĉefaj enhavoj estis tradukoj de religiaj tekstoj. La eldono de la gazeto estas necesa por reaktivigi la agadojn de ŭonbulanaj esperantistoj. Kaj por plialtigi lingvokapablojn de ili, tio estas ankaŭ necesa.
La fondo de esperanta templo en eŭropo
Se eblas, estas rekomendinde ke la centro de ŭonbulismo establas siajn templojn en eŭropo, kie pastroj ĉefe uzas esperanton. Tio povus doni meritojn por facile kontakti kun eŭropanoj kaj por propagandi ŭonbulismon al ili. Ankaŭ tio povus fariĝi grava trairejo ligi enlandajn kaj eksterlandajn esperantistajn kredantojn kiel unuon. Pivote de tiuj temploj, ŭonbulanaj esperantistoj havos ŝancojn anonci kaj propagandi ŭonbulismon en multaj renkontiĝoj.
Radiostacio Ŭonum
Ŭonbulismo nun havas sian radiostacion nomatan Ŭon-um Bangsong en kelkaj urboj en koreio. Estus necese utiligi ĝin je propagando de esperanto. Se eblas, estas bone ke ŭonbulanaj esperantistoj povas partopreni en iu programo por prezenti esperanton kaj niajn agadojn en esperantujo. Pro tio, ni povas varbi samideanojn, kiuj havas interesojn pri esperanto, kaj ni povas disvastigi niajn agadojn kun ili .
Malfermi ĉambrojn de temploj por esperanto-lernado
Por anonci esperanton kaj por doni ŝancojn facile lerni ĝin al ĉiuj, la centro de ŭonbulismo nun malfermas pordojn de tutlandaj temploj. En iu senco tio kontribuos por esperanto-movado de mia lando
Estonta agadplano
Ni, ŭonbulanaj esperantistoj ĉiam devas havi kredon kaj praktiki ĝin en ĉiu taga vivo. Kaj ni diligente lernos kaj studos esperanton por altniveligi lingvokapablojn. Ankaŭ por ekzerci nin, ni multe havos ŝancojn partopreni en diversaj esperantaj renkontiĝoj enlandaj kaj eksterlandaj. Kaj en ni devas naskiĝi eminentaj talentaj esperantistoj, kiuj okupas sin al publikigo de gazetoj, al edukado. Ankaŭ ni senĉese klopodos por edifo.
Buroo de internaciaj aferoj de ŭonbulismo devas pli forte subteni la agadojn de ŭonbulanaj esperantistoj. Ni esperas, ke kelkaj el pastroj de internacia fako povus poroli esperanton. Plie, la centro iam devas fondi esperanto-fakon en universitato Wonkwang ne nur por eduki talentajn specialistojn de esperanto sed ankaŭ por edifi kaj propagandi ŭonbuismon tra la tuta mondo.